دليل الناخب, الجزء الثالث: قوائم الدائرة الأولى - القاهرة

محافظة القاهرة الدائرة الأولي:

حدودها كالتالي: الساحل ، روض الفرج ، شبرا ، الشرابية ، الزاوية الحمرا ، الزيتون ، الأميرية ، الوايلي ، حدائق القبة.
عدد أعضائها: 10 أعضاء
 
أي ناخب هيصوت لقائمة واحدة فقط بأكملها, ماينفعش تختار أكتر من قائمة وماينفعش تختار أفراد بعينهم أو تشطب على اسماء في قائمة, عدد الناجحين من أي قائمة بيعتمد على نسبة المصوتين وبيدخل المجلس الاعضاء بترتيب ورودهم في القائمة.

ملحوظة: أي تحالف أو كتلة هيكون موجود في ورقة الإنتخاب بإسم حزب رئيسي بسبب تعقيدات بيروقراطية لاشتراط إن التقدم بقوائم يكون مقصور على الأحزاب المشهرة فقط.

•  قائمة الثورة مستمرة

تحالف الثورة مستمرة يضم "ائتلاف شباب الثورة" وحركة شباب من أجل العداله و الحريه و"حزب التيار المصري" و"حزب مصر الحرية" و"حزب المساواة والتنمية" و"حزب التحالف الشعبي الإشتراكي" و"حزب الإشتراكي المصري" و"حزب التحالف المصري"
التحالف هيكون موجود في ورقة الإنتخاب تحت اسم "حزب التحالف الشعبي الإشتراكي"
رمز القائمة على مستوى الجمهورية (الهرم)
 

والقائمة تتكون من المرشحين:

1. د/احمد محمد عبد الوهاب – فئات
2. ابراهيم أبو العطا – عمال, عضو مؤسس فى حزب التحالف الشعبى الاشتراكى
3. هدى برسوم – فئات
4. كريمه فرج – عمال
5. محمود عبد الله السيد – فئات, محام امام محكمة النقض والمحكمة الدستورية العليا ومحكم دولى, شارك فى تأسيس المنظمة المصرية لحقوق الانسان.
6. مدحت شكري قديس – عمال, عضو مؤسس بحزب التحالف الشعبى الاشتراكى.
7. عادل على احمد منصور – فئات
8. حسين مختار حسين – عمال
9. يحيى الدهشان – فئات
10. عبد العزيز على فتحي – عمال

قائمة تحالف الثورة مستمرة شمال القاهرة/

قوائم الثورة مستمرة

قوائم تحالف الثورة مستمرة علي مستوي الجمهوريه

**************

• قائمة الوسط :

رمز القائمة على مستوى الجمهورية (المصباح الكهربائي)

1. عمرو عبدالمقصود الزهيــرى فئات - المحامى وخبير التحكيم الدولى, روض الفـرج
2. محمد محمد أحمد حسن عمال
3. محمود محمد فتحي بدر فئات - وكيل مؤسسي حزب الفضيلة
4. حمدي مصطفي أحمد مصطفي عمال
5. جيهان رجب رياض علي فئات
6. مصطفى فتوح عزازي عُمال
7. محمد عبدالرسول  أحمد عبد الرحمن فئات - أمين شرق القاهرة بحزب الوسط
8. محمد عبدالعال علام عمال
9. هيثم حلمي عبد الخلق عفيفي فئات
10. شعبان سيد علي عمال

قائمة حزب الوسط شمال القاهرة

قوائم حزب الوسط بالمرحلة الأولى 

**************

• الكتلة المصرية

أحزاب الكتلة التي تضم: التجمع، والمصريين الأحرار، والمصري الديمقراطي الاجتماعي
أنا شخصيا ليَّ تحفظات كتير على الأحزاب المكونة للكتلة وان كان ليها مرشحين محترمين كتير زي عماد جاد في شبرا ومحمود سالم في مصر الجديدة
احزاب الجبهة الديمقراطية ومصر الحرية الخاص بعمرو حمزاوي كانوا منضمين للكتلة لكنهم انسحبوا قبل تقديم اوراق الترشيح
الكتلة هتكون موجود في ورقة الإنتخاب تحت اسم "الحزب المصري الديمقراطي الاجتماعي"
رمز القائمة على مستوى الجمهورية (العين )

قائمة الكتلة المصرية للدائرة الأولى شمال القاهره

1. عماد جاد بدرس بدروس شبرا فئات - عضو الهيئة العليا بالحزب المصرى الديمقراطى الاجتماعى, نائب مدير مركز الاهرام للدراسات الإستراتيجية, 49 سنة
2. خالد محمد عبد العزيز شعبان (وشهرته خالد عبد العزيز شعبان) الوايلي عمال - حزب التجمع
3. باسم محمد كامل حامد نصر روض الفرج فئات - عضو الهيئة العليا بالحزب المصرى الديمقراطى الاجتماعى, 42 عام , مهندس معمارى, عضو بالمكتب التنفيذى لائتلاف شباب الثورة, مسئول تنظيم الحملة الشبابية بالجمعية الوطنية للتغيير.
4. عادل صليب بطرس حنا شبرا عمال
5. محمد كمال يوسف فهمي الزيتون فئات - عضو الحزب المصرى الديمقراطى الاجتماعى
6. عبد المعز عبد المنعم مصيلحي البربري الشرابية عمال
7. وائل فوقي عبد الرؤوف عبد العزيز حدائق فئات - عضو الحزب المصرى الديمقراطى الاجتماعى
8. ايمان عبدالغني علي عبد الغني حدائق القبه عمال
9. شريف حنا جبرائيل الوايلي فئات - عضو الحزب المصرى الديمقراطى الاجتماعى
10. تامر كمال محمدي علي حدائق القبه عمال

صفحة الكتلة المصرية على الفيسبوك

*************

• قائمة الحرية والعدالة

رمز القائمة على مستوى الجمهورية (الميزان )

1. حازم فاروق فئات - عضو سابق عن روض الفرج
2. رأفت حامد عمال
3. أمين سليمان اسكندر فئات - حزب الكرامة
4. محمد عبد الرشيد السيد على عمال
5. جمال عبد الموجود يوسف فئات
6. أشرف السيد خليل عمال
7. سامح عطية سلوانس فئات
8. جمال محمد محمد عبد القوى عمال
9. عبير عثمان حسين فئات
10. كمال حمدان عمال

الصفحة الرسمية لقائمة الدائرة الأولي (على الجانب الأيسر من الصفحة ستجد السيرة الذاتية الكاملة للمرشحين)

فيديو دعائي لقائمة الحرية والعدالة

موقع حزب الحرية والعدالة

الصفحة الرسمية لحزب الحرية و العدالة

**************

• قائمة تحالف حزب النور (حزب النور -الأصالة -البناء والتنمية )

رمز القائمة على مستوى الجمهورية (الفانوس )
لم تعلن بعد, ولكن من المفترض ان يتصدرها على راس القائمة محامي الجامعة الاسلامية الشهير أ/ممدوح أسماعيل -المحامى بالنقض -نائب حزب الأصالة -مرشح المستوى العام للنقابة العامة للمحامين
**************

• قائمة حزب الوفد:

رمز القائمة على مستوى الجمهورية (نخلة)

قايمة مليانة فلول من أولها, على رأسها حشمت فهمي نائب الحزب الوطني عن حدائق القبة في دورتي (2000-2005) و (2010-2011) و يليه طارق سباق النائب الوفدي وده كان كسب  في 2010 عن دائرة روض الفرج في الاعادة بالاتفاق بعد تهديد البدوي بالانسحاب من الانتخابات ومن أبرز المساوئ ليه أنه حول معركته أمام المرشح عن حزب الجبهة لمعركة طائفية مستغلا كونه مسيحي!!
مؤيدو طارق سباق يهتفون "إسلامية.. إسلامية" بعد إعلان فوزه على المرشح القبطي بشبرا

جزء من دعاية سابقة لحشمت فهمي مع الحزب الوطني

**************

• حزب العدل

للأسف حزب العدل اللي كان هيبقى اختياري الاول للقائمة نزل في التلات دواير التانية في القاهرة إلا دايرتنا!!رمز القائمة على مستوى الجمهورية (الشعلة)
قائمة مرشحي حزب العدل على مستوى الجمهورية

أنا اختياري الأول في الدايرة حيكون ما بين تحالف الثورة مستمرة وقائمة الكتلة المصرية وقائمة الوسط وبعدهم الحرية والعدالة.

أما بالنسبة لحزب الوفد, أنا مش حساهم في تقوية حزب وطني جديد.

حَـــمْلة دَعـْـــم√ •• لدعم المؤمنين بالثورة و المدنية فى الانتخابات بتقولكوا مين قوائم الفلول ومين  القوائم اللي بتدعم الثورة

باقي الدوائر من حركة دعم هنا

**************

• قائمة حزب الوعي:

رمز القائمة على مستوى الجمهورية (الفنار)
رئيس الحزب المهندس محمود طاهر ومن الأعضاء المؤسسين شادي الغزالي حرب من ائتلاف شباب الثورة  
 قائمة حزب الوعى فى دائرة شمال القاهرة

الصفحة الرسمية لحزب الوعي

 الموقع الرسمي لحزب الوعي

الحزب مالوش نشاط اعلامي واسع وماسمعتش عنه إلا يوم تأسيسه ويوم موافقة لجنة الأحزاب عليه وبس كده, دعايتهم تكاد تكون منعدمة ومعرفتش إن ليهم مرشحين فردي وقائمة في الدايرة بتاعتنا إلا لما نزلت الاسماء رسمي قبل ميعاد الانتخاب بـ10 أيام بس!!
**************

• قائمة حزب مصر الثورة:

رمز القائمة على مستوى الجمهورية (الهلب)
 مؤسسه محمد مجدي صالح مستشار التحكيم الدولي
 قائمة الحزب فى دائرة شمال القاهرة

الصفحة الرسمية لحزب مصر الثورة

يا أنا يا قانون العزل في البلد دي

أنا ضد قانون العزل السياسي فيما يتعلق بالإنتخابات البرلمانية أو حتى الرئاسية المقبلة.

مفاجأة مش كده؟؟ عشان المزاج العام في البلد دلوقتي كله بيدور في فلك العزل والفلول والقصة اللطيفة دي.

في الحقيقة أنا ضد تطبيق قانون العزل من ساعة مابدأوا يفكروا فيه بس ماكنتش شايف الموضوع ده مستاهل المناقشة وتضييع الوقت, بس كان فيه ناس ملهيين في العضمة اللي رماها المجلس العسكري وبيضيعوا وقت وجهد فيها.

من  كام يوم قاضي في محكمة في المنصورة اصدر حكم بمنع مرشحي مجلس الشعب السابق عضويتهم في الحزب الوطني من الترشح في الإنتخابات, مع تأكيدات إن الحكم ده مش قاصر على الاعضاء المرفوع في حقهم الدعوى المذكورة ولكن على كل مرشح ينطبق عليه الحكم ده في كل دوائر مصر.

طبعا فيه ناس فرحت وهللت للحكم "التاريخي" ده وبعدها نزلوا من سبع سما لسابع أرض مع حكم المحكمة الإدارية العليا بالغاء الحكم ده.

ليه بقى أنا ضد قانون العزل؟ أقولكم:

أحزاب الفلول

1. الحكم اللي طلع ده كان ضد فلول الحزب الوطني صح ؟؟ طب وباقي الفلول ؟ حد عنده شك إن رفعت السعيد والسيد البدوي فلول؟ مش كنا بنقول على حزب الوفد والتجمع احزاب أمن الدولة. بالحكم ده كنا هنديهم شرعية المعارضة الشريفة طالما الحكم لم يشملهم.
2. حسب التاريخ, مرشحي الحزب الوطني بينجحوا بالتزوير والتربيطات, مش كلنا كنا شايفين كده؟ طب خايفين من ايه دلوقتي لما النظام "المفروض" اتغير؟ شايفين إن النظام ده كمان هيزور يبقى معركتنا معاه زي يوم 25 يناير مش مع اعضاء الحزب.
3. هم الفلول مفيش حيلتهم إلا دول ؟؟ فيه ألف وش تاني يقدروا يدفعوهم للترشح, يبقى العدو المفضوح أحسن من المتداري.
4. أنا ضد فكرة الوصاية, شايف إن الشعب لو اختار فتحي سرور وزكريا عزمي وصفوت الشريف نفسهم تاني يبقى دول اللي الشعب يستاهلهم ونفس الكلام مع عمرو موسى في الرئاسة على سبيل المثال, اللي عملناه في الثورة كان زقة تغيير لو رجعت تاني يبقى ده دليل فشلنا وفشل الفكرة ومش هينفع نزقها بالقوة.
5. آخر سبب, الحكم أصلا غير دستوري ولو كان التنفيذ كان هيتطعن فيه بألف طريقة تاني يوم الإنتخابات ده كمان حيتحول لسيف على رقابة البرلمان لو كان فيه الرجا بالتهديد بالحل لشبهة عدم الدستورية في أي لحظة هم عاوزينها.

رأيي كان ولازال مع مشاركة الفلول واحزاب الكارتون والتيار الاسلامي والليبرالي واليساري في الإنتخابات عشان كل واحد يعرف حجمه ونخلص بقى.

أما واجبي فهو التوعية وسط الناس بحقيقة كل حزب وتيار ومراقبة الانتخابات دي لحماية اصواتنا وفضح أي تزوير ممكن يحصل.

مع الاحتفاظ بحقنا الكامل في اللجوء للشارع في حالة اخلالهم باقي من مطالب التغيير

دليل الناخب, الجزء الثاني: دورات سابقة

قبل 2011 كانت الدائرة متوزعة على 3 دوائر انتخابية منفصلة بس تم ضمهم في التقسيم الجديد.

• قسم شرطة حدائق القبة    

تاريخ دايرة حدايق القبة في ال20 سنة اللي فاتوا يتلخص في إن مقعد العمال محجوز لعبد العزيز شعبان عن التجمع والمقعد الآخر بيتنافس عليه بقي المرشحين ودايما بيفوز بيه مستقل بينضم للحزب الوطني تاني يوم.

في 1995 كسب محمد فضل رجب وفي 2000 كسب حشمت فهمي وفي 2005 كسب محمد الحسيني
في 2010 التزوير كان مترتب من الأول ونجح حشمت فهمي بصفته مرشح رسمي للحزب الوطني مش مستقل وكان أبرزمرشح ضده الاخواني عمرو زكي  ودخل عبد العزيز شعبان الإعادة امام فؤاد اللواء عن الحزب الوطني بس قدر يكسب في النهاية.
لكن بعد نهاية المعركة الانتخابية دي, توفي شعبان قبل الجلسة الإفتتاحية لمجلس الشعب الشهيرة بـ "خليهم يتسلوا" وتم فتح باب الترشيح مرة تانية لإنتخابات تكميلية واللي أجريت في 23 يناير 2011 وأسفرت عن جولة إعادة بين مرشح حزب السلام الديمقراطي حسين أبوجاد وبين المستقل - وقتها - سيد عيد وكان المفترض تتم يوم 29 أو 30 يناير بس الحمد لله الثورة قامت واتفرض حظر التجول وتم حل مجلس الشعب من اساسه.

• قسم شرطة الزيتون   

طبعا زكريا عزمي رئيس ديوان رئيس الجمهورية مسيطر على مقعد الفئات في آخر 25 سنة ويقال إن حتى مرشح العمال كان لازم يحصل على موافقته ونجح معاه في انتخابات 2005 و2010 مصطفى عبدالوهاب.

• قسم شرطة الوايلى   

في دورة 2005-2010 ودورة 2010-2011 نجح نفس الاتنين المرشحين عن الحزب الوطني د/شيرين احمد فؤاد فئات وعبد الحميد شعلان عمال.
 

من الاعضاء السابقين
 
منير فخري عبد النور سكرتير عم حزب الوفد ووزير السياحة الحالي بعد الثورة من عائلة سياسية مخضرمة, نجح في الانتخابات في 1995 بعد فوزه على أحمد فؤاد عبد العزيز والد النائب اللاحق شرين ونجح في 2000 لكن خسر في 2005 وسط تقفيل الدايرة لمصلحة الوطني فحاول يتجاوز ده ورشح نفسه في مسقط رأسه في سوهاج في 2010 وسقط برضه.

فوزى شاهين عنده 86 سنة كان عضو مجلس الشعب عن الحزب الوطني في دورة 90 و95 و2000.
 

في الجزء التالت هأتكلم عن الفلول المرشحين في انتخابات 2011.

Tweet

دليل الناخب (حدائق القبة - الزيتون - الأميرية - الوايلي) الجزء الأول

بعد اللخبطة اللي حاصلة في توزيع الدواير والصعوبات اللي بقت بتواجه الكل, سواء المرشحين اللي من المؤكد صعب عليهم تغطية المساحات دي كلها أو الناخبين اللي بقى صعب عليهم يقدروا يتعرفوا على العدد ده كله ويختاروا الاصلح منهم وكمان يميزوا الفلول السابقين.
قررت استفيد من متابعتي لمعظم الانتخابات البرلمانية في ال15 سنة اللي فاتوا واعمل الدليل ده اولا لنفسي عشان انظم معلوماتي وافاضل بين المرشحين وبعد كده قررت انشره عشان افيد غيري واوفر عليهم الجهد والوقت. 
حاولت في الدليل ده أبعِد عن أي انتماءات أو تفضيلات ... بس في الآخِر بعد ما انتهي من العرض هاكتب اختياراتي, يمكن يكون حد عنده معلومة أحسن مني يشارك بيها.


في البداية ازاي تعرف أنت مسجل في أي دائرة وحدود دائرتك ايه؟



هتدخل على الموقع ده وتشوف:

الموقع الرسمي للجنة القضائية العليا للانتخابات


بعد ماتفتح الموقع هتدخل رقمك القومي هيقولك أنت مسجل في أي دايرة فردي وقائمة

(اضغط الصورة للتكبير)

لما استخدمتها ظهر لي إني في دائرة القاهرة الثانية بالنسبة للفردي وحدودها كالتالي: الزيتون - الأميرية - الوايلي - حدائق القبة
عدد أعضائها: عضوان


وحدود  الدائرة موضحة في الخريطة دي من نفس الموقع

دائرة القاهرة الثانية فردي (اضغط الصورة للتكبير)

وظهر كمان اني في دائرة القاهرة الأولى بالنسبة للقائمة وحدودها كالتالي: الساحل ، روض الفرج ، شبرا ، الشرابية ، الزاوية الحمرا ، الزيتون ، الأميرية ، الوايلي ، حدائق القبة.
عدد أعضائها: 10 أعضاء


وحدود  الدائرة موضحة في الخريطة دي

دائرة القاهرة الأولى قوائم (اضغط الصورة للتكبير)

في الجزء التاني هأتكلم عن أبرز المرشحين والنواب اللي ظهروا في الدواير دي في الانتخابات السابقة.

Tweet